přikład
Luby fitnesowy team!
Z wulkim zajimom čitach Waš flyer z naprašowanjom a chcu Wam rady wotmołwić.
Ideju wjacegeneraciskeje sportoweje a strowotniskeje agentury jara witam. Móžu sej derje předstajić, zo wuwiwa so fitnesowe studijo přez tajki poskitk na wažne zetkanišćo wjacorych generacijow. W bliskosći stej tola starownja a pěstowarnja.
Za wuměnkarjow a pěstowarske dźěći móhli so na přikład dopołdniše kursy poskićeć. Tak słužitej sport a hibanje polěpšenju žiwjenskeje kwality, ale tež jako mosćik mjez generacijemi. Popołdniše abo wječorne poskitki móhli srjedźnu generaciju a młodostnych přiwabić. Přez kónctydźenske poskitki bychu so wosebje swójby z dźěćimi wjeselili.
Nimo hibanja bychu so mi poskitki za masaže, wotpinanje lubili. K derjeměću słuša tež strowe zežiwjenje. Tohodla móhli ludźi z referatami abo wosobinskimi poradźowanjemi lěpje informować abo samo při zwoprawdźenju přewodźeć.
Jeli maja młodźi a starši tu sportować, dyrbjeli parkury tež wotpowědnje wuhotowane być, potajkim z lochšimi nastrojemi a naročnišimi. Na lochšich nastrojach móhli snano tež zbrašeni zwučować.
A potom faluje hišće přijomna kofejownja – a hotowa je platforma za zetkanja, bjesadu a zhromadnosć mjez wobydlerjemi našeho měšćanskeho dźěla.
Z mojimi myslemi (sonami) sym snano wulku diskusiju wubudźiła. Chcu tež rady pomhać ideje zwoprawdźić, na přikład w spěchowanskim towarstwje.
Wjeselu so na Wašu reakciju.
Wutrobnje strowi
Michaela Ryćerjowa