pśikład
Luba kněni Kalcowa,
jo, to jo pšawje, až smy na zgromaźinje spěchowańskego towaristwa powědali wó šulskem dwórje a šulskej zagroźe. Su pśišli někotare naraźenja k wugótowanju. Móžom je Wam krotko napisaś:
Šulski dwór – how deje se nowe ławki stajiś. A pódla kuždeje ławki dej se bom sajźaś.
Šulska zagroda – dej se wěcej wótgłosowaś z ceptaŕku wěcneje wědy, ako jo zagronita za wobstaranje šulskeje zagrody, kaku zeleninu trjebaju w šulskej kuchni. Wótpowědnje dej se taka zelenina sajźaś.
Móžnosći za financielnu pódpěru su wobgranicowane, dokulaž spěchowańske towaristwo ga jo akle ten nowy płot za šulsku zagrodu zapłaśił a tak su te rezwerwy momentanje pśetrjebane. Ale starjejše su zwólniwe raz jadnu sobotu pomogaś te ławki nastajiś, gaž blidaŕ jo gótowy. We tom zwisku deje se teke te bomy sajźaś a se ceły dwór pórědnje wurěšyś. How by mógali ceptarje a źiśi pomogaś. Snaź by źiśi samo mógali naraźenja gótowaś, kak by se swój šulski dwór žycyli. Wó tom by mógali se na konferency rozgranjaś.
Tak daloko za źinsa, naźejam se, až som mógał pomogaś.Wjele wuspěcha na pósejźenju. Snaź móžomy pón raz telefoněrowaś.
Ze serbskim póstrowom,
Michael Mucha