Diagram dokumentuje čłonstwo w sportowych towarstwach Sakskeje, cyłkowne porno žonam a holcam. Hnydom napadnje, zo najwoblubowanišej sportowej disciplinje stej kopańca a wolejbul. Nastupajo kopańcu njejsu žane dwěle, to je tradicionelnje najwoblubowaniši ludowy sport. Sym tež wočakowała, zo je podźěl mužow w kopańcy wo wjele wyši hač podźěl žonow. To je tež jasny trend diagrama. Přichodne lěta bych stupace ličby žonow wočakowała, dokelž zda so žónska kopańca być dźeń a atraktiwniša. We wolejbulu rozdźěl mjez mužemi a žonami hižo tak wulki njeje. To su tež moje nazhonjenja. W našim towarstwje, hdźež aktiwnje wolejbul hraju, smy nimale telko žonow kaž mužow. Mamy tež měšane mustwa.

Powšitkownje wučitamy z diagrama, zo sportuje w najwjace sportowych disciplinach wjace mužow hač žonow w sportowym towarstwje. W płuwanju a lochkoatletice je podźěl jara wurunany. Jenož w rejowanju, jěchanju a ćěłozwučowanju je podźěl žonow porno mužam jasnje wyši.

Tróšku dźiwała sym so, zo je kolesowanje, kiž je nimo wolejbula mój najlubši sport,  tajka podreprezentowana sportowa disciplina. Sama jara rady kolesuju a w přećelskim kruhu mam wjele ludźi, kotřiž rady kolesuja. Podamy so kónc tydźenja rady na dlěšu kolesowansku turu z wubědźowanskim charakterom. Snano je ličba w towarstwje registrowanych kolesowarjow tak niska, dokelž chce so jenož mały dźěl kolesowarjow w towarstwje angažować a aktiwnje trenować. Tež tu je jasnje wjetši podźěl mužow hač žonow.

W statistice pokaza so snano tež mały trend w młódšej generaciji, na př. zo pućowanje a krosnowanje, tenis abo jěchanje su dosć woblubowany sport. Namakamy je w srjedźnym polu diagrama. Sportowej družinje z najmjeńšim čłonstwom stej golf a płachtakowanje, štož móhło na tym zaležeć, zo je w Sakskej mało golfowanišćow, zo njeje žane morjo, ale jenož něšto jězorow za płachtakowanje.