Diagram dokumentuje zajimawe a wažne wuslědki. Slědźerjo su dwě starobnej skupinje přeslědźili: młódšu (14-39 lět) a staršu (40-69 lět) generaciju. Z diagrama hodźi so překwapjacy trend wučitać. Časowy wobjim za wužiwanje jednotliwych medijow je so w běhu 5 lět chětro změnił, cyłkowny čas wužiwanja pak nic tak jara. Hdyž bě w lěće 2018 telewizija z mediateku tež za młódšu generaciju hišće jasny hłowny medijowy srědk, běštej to 2023 telewizija a hudźba w podobnej měrje. Hladajo na wšitkich přepytowanych, tajki trend njespóznajemy. Tu drje wužiwany čas za telewiziju tež woteběra, ale telewizija wostanje dale jasny hłowny medij. Rozdźěl mjez přepytowanymaj skupinomaj je wosebje na polu digitalnych platformow za filmy, wideja a hudźbu. Přirunujo z młódšej generaciju wužiwa cyłkowne wobydlerstwo tute móžnosće jenož něhdźe dwě třećinje toho časa.

Za mnje wosobinsce bě tež překwapjace, zo nastupajo dalše w studiji mjenowane medijowe družiny mjez skupinomaj žane zasadne rozdźěle njejsu. Wuslědki naprašowanja nam powšitkownje pokazaja, zo staroba wulku rólu njehraje. Poprawom bych sej mysliła, zo cyłkowne wobydlerstwo so wjele dlěje z čitanjom knihow abo nowinow zaběra hač młódša generacija. Markantniše su rozdźěle skerje pola tych platformow, kiž wužiwaja najnowše technologije. Jedna přičina za tute wuwiće móhła być, zo młódši ludźo tute technologije lěpje wobknježa.

Konsum medijow zabjerje dźensa wulki dźěl našeho swobodneho časa. Jednotliwe přepytowane skupiny zaběrachu so přerěznje něhdźe 500 mjeńšinow wob dźeń z medijemi. To je dlěje hač wosom hodźinow. Medije spóžěraja třećinu dnja, potajkim přewjele swobodneho časa.

Staroba so při konsumowanju medijow w našej swójbje wuskutkuje. Wowka a dźěd docyła žane onlinowe medije njekonsumujetaj, ale hladataj telewizor abo čitataj ćišćane knihi. Staršej hižo husćišo onlinowe medije wužiwataj, ale tola wo wjele rědšo hač młoda generacija.