Tema studije jo, kak wjele minutow wob źeń wobydlarje w Nimskej wužywaju medije, to groni telewiziju, radijo, CDje, e-knigły, druge digitalne teksty abo printmedije ako knigły abo casniki. Studija jo z lěta 2020, to groni wóna jo se gótowała pśed 4 lětami. Móžno jo, až jo se w tom casu južo ewentuelnje zasej něco změniło pśi wužywanju medijow. Ale to něnto njejo tak wažne.

Wócywidne jo, až se wužywaju telewizija, wideo, filmy a radijo nejwěcej wót nimskeje ludnosći. A pśi tom nadpadnjo ten wjeliki starstwowy rozdźěl. Starše luźe, nejskerjej te, ako su wjele starše ako 14 lět, wužywaju nejwěcej telewiziju a radijo. Zawěsće maju wóni swóje wósebne rutiny abo zwuconosći pśi glědanju telewizije abo słuchanju radija, na pś. wěste serije, specielne wusćełanja abo powěsći. Młodše luźe wužywaju wěcej digitalne medije, na pś. streaming abo teke mediateki. Radijo jano mały źěl hyšći słucha. Ale w głownem se wě nadpadnjo, až ten rozdźěl mjazy wužywanim awdiowizuelnych medijow  a śišćanych medijow jo markantny.

Ten směr w našom casu jo k digitalnym medijam a pšec wót papjeroweje towarišnosći. Pšašanje jo, lěc to na pśecej tak wóstanjo, wšak su rědnje wugótowane knigły teke mały pókład, ako móžoš pśecej zasej do ruki wześ a pśeběraś. Teke ja, ako som starša wósoba, lubjej mam knigły abo casniki w ruce, a njok je jano měś digitalnje. Se wě jo to teke wěc městna doma. A kuždy, ako mě znajo, wě, až ja wjacor rada krimije glědam. K tomu sejźim spódobnje w sedle, pakosćim słodkosći a dajom se ten wjacor spódobaś.