zwučowanje  2

rěčenje

Modul rěčenje ma tři dźěle.

dźěl 1

krótka prezentacija

0

Prezentujće swojej partnerce/swojemu partnerej skrótka jednu ze slědowacych temow. Maće za to dwě mjeńšinje chwile. Po swojej prezentaciji wotmołwće na prašenja partnerki/partnera.

Po tym zo je Waša partnerka/Waš partner swoju temu prezentowała/prezentował, formulujće prašenja, kotrež Was zajimuja. Při prezentaciji swoju partnerku/swojeho partnera prošu njepřetorhńće.

  • kniha, kotruž sće čitała/čitał (tema a jednanje, awtor, wosoby, stil, Waše měnjenje atd.)
  • film, kotryž sće widźała/widźał (družina filma, tema a jednanje, hrajerjo, Waše měnjenje atd.)
  • dowolowa jězba (cil, čas, krajina, ludźo, kulturne wosebitosće atd.)
  • kulturne zarjadowanje, kotrež sće wopytała/wopytał (stil, akterojo, městno, Waš posudk atd.)
  • sportowe zarjadowanje, kotrež sće wopytała/wopytał (sportowa družina, sportowcy, městno, wuslědk, Waš posudk atd.)
          dźěl 2

          wo wobsahu teksta diskutować

          0

          Čitajće slědowacy nowinski tekst. Diskutujće ze swojej partnerku/swojim partnerom wo wobsahu teksta.

          Zaplećće swójske nazhonjenja a měnjenja sobu. Wopodstatniće swoje argumenty. Rěčće wo móžnych rozrisanjach.

          1

          Idealny dowol w hotelu abo bydlenskim wozu?

          Byrnjež swoje powołanje lubowali a rady na dźěło chodźili, začuwa drje kóždy žadosć za dowolom – za časom bjez zamołwitosćow a winowatosćow, časom swobody a samopostajowanja bjez terminow, časoweho ćišća a wšědneje hektiki. Tola mysle na dowol wubudźeja pola kóždeho hinaše asociacije.

          Ći jedni njemóža dočakać, zo móhli sej do dalokeho swěta wulećeć. Žedźa za eksotiskimi cilemi, za přirodu, kulturu a architekturu, kiž w Europje njenadeńdźeš. Druzy porno tomu su doma na zahrodźe najzbožowniši abo maja w swojej domiznje něhdźe swój mały raj, do kotrehož sej najradšo wuleća, hdyž maja raz někotre dny abo tydźenje swobodne.

          A tak ma tež kóždy swoju filozofiju, hdyž dźe wo to, hdźe a kak w dowolu přenocować. Móžnosćow wšak je dźensniši dźeń wjele: hotel, stan, priwatne bydlenje, młodownja, pensija, bydlenski wóz, dowolowy domčk, njerěčo wo cyle njewšědnych móžnosćach kaž płuwacych chěžkach na jězorach a podobnym.

          Lubowarjo hotelow chwala sej, zo sčini so jim pobyt w tajkim domje tak přijomny kaž móžno – maš swójsku stwu, wuhotowanu z medijowej techniku, njetrjebaš swoje łožo słać ani kupjel rjedźić, rano je bohata snědań spřihotowana, wšelke poskitki domu zaručeja přidatne derjeměće, personal steji k dispoziciji, hdyž je pomoc trěbna, lokalne turistiske atrakcije su runje tak bliske kaž zwiski k wobchadnej syći.

          Su pak tež ludźo, kotřiž sej za sebje ničo hinašeho předstajić njemóža hač dowol z bydlenskim wozom. Mobilny nóclěh dawa jim začuće njewotwisnosće a njewjazanosće na wěste městno. Ručež jim za tym je, móža dale jěć – njetrjebaja kófry pakować, ani druhdźe za swobodnej stwu pytać. Najbóle zahorjeni pak su přiwisnicy campinga wo zwjazanosći z přirodu, kotrež jim pućowanje z bydlenskim wozom zmóžnja. Trjebaja sej jenož blidko a stólc před durje stajić a hižo móža woměrje rjanosće flory a fawny do so srěbać. Wotpowědnje wuhotowanju swojeho woza móža swójske sanitarne připrawy wužiwać a sej tež druhi komfort lubić dać.

          Je derje, zo ma kóždy swoje wosobinske priority a potrjeby. Štož chwala sej ći jedni jako wulke lěpšiny, wobhladuja druzy snadź jako njelěpšiny. Abo dawa tola něšto kaž „idealny dowol“?

          2
          dźěl 3

          zarjadowanje planować

          0

          Wuwijće zhromadnje ze swojej partnerku/swojim partnerom plan a program za zetkanje serbskeje młodźiny z Łužicy a młodźiny z druheho regiona abo kraja.

          Zaměr měł być, zo so młodostni mjez sobu derje zeznaja a zo zhonja a nazhonja tak wjele kaž móžno wo kulturje a (regionalnych) wosebitosćach partnerskeje skupiny.