zwucowanje 1
rěcne elementy
Toś ten test ma dwa źěla. Wobźěłajśo wósobinski a casnikaŕski tekst z proznotkami, kótarež deje se wupołniś.
Sćo w prědnem źělu wótrězka rěcne elementy. Dopołniśo nadawki a klikniśo pótom na „dalej“. Za tym se zachopijo drugi źěl. Gaž sćo wobej źěla absolwěrowali, zgónijośo wuslědk.
Cytajśo slědujucy tekst. Naklikniśo za kužde prozne městno pšawe słowo.
Luba Daniela,
mam špatnu wědobnosć, som kśěła tebje južo pśed mjasecami pisaś, ale ako wěš, som se pśigótowała na kóńcne pśespytowanje a ( 1 ) měła žeden cas. Razka za swóje hobbyje nic – njejsom w slědnem casu na pśikład žeden kusk na wiolinje grała. Njewěm južo, ( 2 ) to docełego hyšći wumějom. Gaž maš taki wjeliki eksamen pśed sobu, se wšo jano hyšći wjerśi wokoło wuknjenja. Ale něnto som zwónoźeła! Pśedcora jo było slědne pśespytowanje a mam zacuśe, ( 3 ) som derje wobstała. Gaž pśespytowarje to teke tak ( 4 ), som něnto diplomowa psychologowka! Super, nic ga?
( 5 ) luby Micha jo mě ned wjacor do ( 6 ) gósćeńca pśepšosył. Pótom smej hyšći šłej ( 7 ). To jo było to pšawe, nic jano wódychanje, ale śělne wurušowanje.
W slědnem ( 8 ) sy se pšašała, lěc com z tobu na jaden tyźeń do Londona jěś. Se wě, rada! Pó tom cełem stresu, jo to ( 9 ), raz něco wósebnego cyniś. London jo kšasne město, som južo wjele wó ( 10 ) cytała, ale bóžko hyšći njejsom tam była. Togodla som wjelgin narska. Za woglědanje ( 11 ) wósebnje zajmuju Buckingham Palace a Madame Tussauds London, British Museum a London Dungeon.
Naraź pšosym někotare terminy, gaž maš cas. Ja w prědnem tyźenju septembra njamóžom, tam swěśi naša mama swój 65. narodny źeń, ale howacej źo. Som se wěsta, až móžomej se ( 12 ) jaden tyźeń dojadnaś. Ja južo raz póglědnjom do interneta za dobrymi lětami a dobrym hotelom za naju. Wjaselim se južo wjelgin na drogowanje a na twój pśiducy list.
Wutšobny póstrow,
Andrea
Sćo w drugem źělu wótrězka rěcne elementy. Dopołniśo nadawki a klikniśo pótom na „dalej“. Za tym zgónijośo wuslědk wótrězka rěcne elementy.
Cytajśo slědujucy casnikaŕski tekst. Pótom cytajśo słowa w kašćikach. Rozsuźćo, kótare słowo góźi se nejlěpjej do kótarego proznego městna a śěgniśo jo z myšku na wótpowědne městno. Wy smějośo kužde słowo jano jaden raz wužywaś. Styri słowa njebuźośo trjebaś.
Serbske źowća na plaketach ADAC
W ludnosći tak pomjenjone „Žołte janźele“ ( 13 ) awta a sobuźěłaśerje ADAC. Wóni pomogaju w nuznych padach na droze a spóraju motorowe wózydła zasej k dalejjězdźenju. ADAC jo se załožył 1903 w Stuttgarśe ( 14 ) towaristwo za jězdźarje motorskich. W lěśe 1911 jo se pśetwórił na „Allgemeiner Deutscher Automobil-Club“. Ako taki ma źinsa wěcej ako 20 milionow cłonkow a nowe sedło ( 15 ) Mnichowje.
Mimo cwiblowanja su teke Serby cłonki ADAC. Njeznate pak jo, ( 16 ) w stawiznach ADAC dajo teke małučke „serbske“ facety. A to zwisujo tak: Kužde lěto zgromaźuju se cłonki motorowego a awtomobilnego kluba ( 17 ) swójej głownej zgromaźinje, a to pśecej ( 18 ) hynźi. Tamkor jědu cłonki pótom z cełego kraja, teke, aby luźe a kraj póznali. Pśi takich góźbach se wudaju spomnjeńske plakety.
Te se pśecej orientěruju pó kulturnych wósebnosćach woglědanych regionow. Cesto su nastali rědnje wugótowane a ( 19 ) barwojte emalěrowane wuměłske drogotki. ( 20 ) raze su se cłonki ADAC teke zmakali we Łužycy. Pótom su ( 21 ) wótergi dostali serbske motiwy na zmakańske plakety. To pak jo se ( 22 ) něntejšnem slěźeńskem stawje jano stało w ranych stawiznach kluba. Pódobnje kaž listowe znamki a póglědnice su se te plakety spěšnje wuwijali k zběrańskim pśedmjatam. Dotychměst jo šesć takich serbskich motiwow na nich znatych. ( 23 ) jadnu plaketu jo na pśikład słužyło serbske źowćo we Wórjejskej drastwje ako pśedłoga. Źinsa pak wuslěźiś fotografow, wugótowarjow abo samo wusokosć nakłada takich plaketow, to njejo wěcej móžno.
Ale móžomy ( 24 ) wěstosću na to pokazaś, až teke Serby su w stawiznach ADAC swóje slědy, lěcrownož snadne, zawóstajili.
(pó Pratyji 2013, b. 103-104)